2009/11/6
北大医院（具体附属几院、全称都唔知，唯有就咁叫）既一个教授系该医院骨科手术后死亡，遂状告其医院无证行医。“无证行医”既其实系博士生，具体死亡过程唔系咁清楚，因为无详细了解，就知道个大概。
博士生都仲未有执业证，唔通系唔比考？定系考唔到？如果系唔比考，咁硕士都应该唔比考，咁北大医院入面咪超多无证人员？如果系考唔到，咁既人都入到北大医院？
无证又睇病，哩个系全国各大小医院都系架了，包括果个死亡既教授肯定都用过咁既学生。唔知佢有无林过自己会比哩啲人害死？唔知佢既无证手下又有无医死过病人？
一个该医院教授死咗先爆到咁大单，唔知会唔会好似汽车钓鱼事件咁引出更多牵连案件呢，将会有更多死亡案例被抄返出来讲。
行医环境继续恶劣。
2009/3/28
今晚会全球停电，不过系主动停，唔系被动停。可能发稿既时间已经有地方开始停了。
好多人讨论停电做咩好，有团体就趁此机会搞户外活动吸引眼球，个人既大多数系训下觉、唱下歌、散下步之类做下啲唔使用电既嘢。不过有啲人就系度秘密讨论紧点样进行违法活动。公众、私人地方唔开灯，咁多人出街，无论系偷嘢、强奸、打劫，定系走佬、破坏、黑客等等，都系一个得天独厚既时机，具体点样有利我就唔介绍了。
不过只得一个钟，都搞唔到啲咩出来。第二日报纸、电视唔见得就会大幅报道琴晚有几多几多坏事发生，估计篇幅都系讲啲人点样过哩个环保既时刻。
先唔讲有几多人今晚依然追电视剧或者上网吹水，啲坏人都可以好“环保”咁关晒自己屋企啲灯出街“助兴”，要搞好环保活动都唔系咁容易。
2009/3/24
电影名 导演 音乐
长江七号 周星驰 黄英华
恶男事件 李光耀 罗坚
黑势力 钟少雄 温昊翁
爱斗大 七条 韦启良
蝴蝶飞 杜琪峰 GuyZerafa、DaveKlotz
功夫灌篮 朱延平 石川光、洪敬尧
花花型警 马楚成 韦启良、阿成
夺帅 罗守耀 韦启良
江山美人 程小东 雷颂德
军鸡 郑保瑞 卢伟华
婚礼2008 张承 严励行、金培达
我的最爱 叶念琛 黄英华
一个好爸爸 张艾嘉 黄韵玲、钟兴民
三国之见龙卸甲 李仁港 黎允文
六楼后座2家属谢礼 黄真真 伍乐城、谢国维
爱情万岁 崔允信 谢国维、黄思彦、朱俊杰
吓死你 钱江漢 周俊伟、韦启良
七月好风 谭国明 EdmundLeung
助念新星 邓德荣 朱庆祥
我老婆係赌圣 王晶 罗坚
青苔 郭子健 泰迪罗宾、韦启良
爱与狗同行 陈安琪 卢凯彤、曾永曦
文雀 杜琪峰 XavierJamaux、FredAvril
深海寻人 徐克 何国杰
无野之城 刘国昌 包以正
赤壁 吴宇森 岩代太郎
天水围的日与夜 许鞍华 陈思乐
女人我最大 侯永财 吉米
内衣少女 陈庆嘉 张人杰
亲爱的 叶念琛 泰迪罗宾、韦启良
大四喜 林子聪 麦振鸿
第一诫 唐永健 亚历克斯、黄祖儿
一半海水一半火焰 刘奋斗 伍乐城
保持通话 陈木胜 NicolasErrera
金瓶梅 钱文锜 罗坚
风云决 林超贤 黎允文
画皮 陈嘉上 藤原育郎
车票 张之亮 何崇志
武侠梁祝 马楚成 赵增熹、符元伟
武侠之少年行 司徒永华 刘熙信、陈哲庐
有只僵尸暗恋你 錢江漢 罗坚
夺标 徐小明 罗坚
烈日当空 麦曦茵 卢伟华
渺渺 程孝泽 李欣芸
绝代双娇 叶念琛 罗坚
证人 林超贤 黎允文
亲密 岸西 褚镇东
性工作者2 邱礼涛 麦振鸿
女人不坏 徐克 李偲菘、李伟菘
叶问 叶伟信 川井宪次
哩个系从官方度得到既报名名单，不过唔保证百分百准确性。
贴既时候造成错位，无办法，因为用HTML整表格好麻烦。
边个被提名大家已经知了。
大部分无出过碟，小部分连电影都未听过。
不过都有啲好嘢系入面。
2009/2/11
讲道理好定系唔讲道理好？咁当然系讲道理好。但系讲道理仅限于部分人。讲道理既人有咩特征？讲道理有咩要求？
同人讲道理唔系识讲嘢就得，唔系耐心就得，圣人同莽夫讲道理，讲到死都无人理。有啲人唔使讲，佢就已经明白了，有啲人经过一番说解，仲可以渐渐明白，有啲人讲到耳膜穿都完全无用。讲道理唔容易，虽然系好事。
大家都知系好事，但系如果咁容易，就唔会有战争、冲突、吵闹。圣人又如何，自己明白事理，但系讲服唔到其他人，又唔可以用其他手段影响到其他人，就同废人无异。讲道理唔系为咗理论进步，而系为咗解决实际，但自古至今，靠讲道理搞掂既事真系无乜，靠既仲系能力。
咁明事理有咩用？不如大家都埋头只增加能力算了。咁又无咁简单。当有矛盾既时候，讲道理已经搞唔掂了，就要靠能力比拼，对于社会进步既结果系有道理既人获胜，而唔系能力更强既人。当自己于其中时，有道理可以获得支持，提高己方力量，有助打败对方；当自己于其外时，则希望明事理既好人获胜，以免坏人得势祸及自己，本质即系希望个个都明事理，从而杜绝胜利方系坏人。
大家睇完上面系咪觉得废话？无错，上面就系我系度讲道理，讲道理就系废话，唔系叫大家唔好做，系话做咗都无用遮。
2009/2/3
我地除咗系自己既职业上为人民服务，仲有啲咩嘢可以帮到外人？消费都可以架。唔系话要用多啲钱消费，只系係依家消费基础上做多小小嘢。
出去买嘢、食嘢或者使用交通工具、去公众地方，都会接触到人，有啲系服务群体，有啲同我地一样系消费群体。表面上我地同服务群体只系简单消费关系，钱银流通完就byebye了，同消费群体甚至拉唔上关系。但我地可以做得更多。例如我地系着装仪容上花多小小心思，女仔可以化小小妆（千祈唔好化浓妆，特别系阿婶），男仔干净企里啲，服务群体都会舒服啲，周围既人又会舒服啲，我地言谈举止亲切友善啲，个个人都会开心啲，正所谓你好我好大家好。可能我地唔会得到咩实质既收获，但系可能服务人员会教多我地一啲本来唔会教既招数，或者会比多小小优惠我地，周围既人又会增加对哩个区域、地区、城市、国家既好感，分分钟影响到好多人。
我地要付出几多？最多只系压抑住本身既痛苦笑多啲、阳光多啲。对我地自己来讲，咁做亦可以帮助我地减轻痛苦，同时令我地靓啲。
2009/1/18
哩啲唔系咩新鲜嘢，电视好似几年前都播过了，不过今次就亲身体验咗下。
由单位组织，众人来到花都既芙蓉度假区，成个度假区都好大下，好多年前就已经有架了，不过都仲有啲地方可以开发紧。户外拓展区系个山上，本来有条水流拦腰穿过，不过依家冬天干晒水，我地就无玩水上项目。啲嘢睇上去都几旧下，应该就搞咗好多年了。早几年兴哩味嘢既时候，应该都好多人来玩下，依家就唔新鲜了，加上系农历年尾，得我地一班人系度进行。
大家系电视上都睇过好多种项目了，不过今次我地只系玩其中一部分遮，全部玩晒起码要成日，而且就算有时间都无体力。
如果系睇电视既话，因为加工既问题，出来效果得一半左右，我肯定连睇都唔睇，望两眼就转台。不过亲身参与其中，先可以得到身体同心灵既提高。
就讲下一般地方无设备玩既嘢，第度有条件玩既嘢就唔使系度讲了。
好多人以为“信任后仰”（项目名系我改过既，原名唔系咁，下同）系心理游戏，现场睇过或者亲身训过既人就会知道唔完全系。企系下面睇十个人训过，之前点惊会跌亲既人都唔会再惊跌亲，因为只有可能系接既人有事，唔会系训既人有事。哩个项目唔系测试胆量，而系测试集中力既。任何神经功能正常既人，系半空中，身体都会弯曲好似张折凳咁折埋，只有集中精神拉紧下肢同腰背肌肉，先有可能保持笔直，唔好冤枉咗缩埋就系惊。
“盲人拼图”其实唔难，只系准备时间唔够，比我充分准备时间，拼咩图都无问题，当然，要系同啲智力、记忆力正常既人一起做先得。好好彩我地虽然未够时间完全传达晒，但系最后都可以完成到，多得个别有脑既人咁啱执到关键点并利用好。聪明既团队以往做唔到都只系因为唔够时间准备，未可以将所有嘢传达比啲人知遮。不过有啲团队就系比几多时间都系完成唔到既，因为佢地既思维唔够周密，要完成任务系需要大量既逻辑运算既。咁短既准备时间大脑虽然够快可以完成整个运算过程，但系讲话一定唔够快，所以肯定传达唔晒。逻辑思维一般人唔一定有专门去学，但系睇电影、电视剧、动画漫画、小说等都一路系度学紧，好多人已经具备咗林晒成个拼图步骤细节既能力了。
高空项目唔同于机动游戏，除咗体验离开大地既感觉，仲要系身体同精神上适应佢。如果无咗用心去适应，就好似只系玩咗下过山车咁，仅仅得到短时间既冲击，细胞未形成基本既适应转变。细胞转变系需要能量既，所以草草了事既人唔觉得点累，但系慢慢进行或重复协助既人就好消耗体力。
虽然啲设计几年前就已经有了，不过未参加过既我仍然可以感受到入面既智慧同巧妙，比起单纯吃喝玩乐有唔同既收获（之所以唔用更多收获，系因为吃喝玩乐唔代表只有浪费无收获，一样有既，唔可以歧视人地）。
2009/1/5
今年开始搞咗包月上网，即系话上网时间肯定比以前长了，哩度既内容就会多咗，非主观创作既嘢可能会多了。
不过啱啱传来不利既消息，哩度可能会搬可能会调整，睇下果边点先，好地地我就唔想郁了，不过无办法。
2008/12/26
雄性既占有欲比雌性强。
占有欲唔同于性欲，好似倪震果啲，只系性欲强，唔系占有欲强，所以佢连结婚都唔要求。占有欲唔限于人，占有既嘢包括具体事物同抽象事物。
雄性雌性生理上既差别在于激素多少，由此推论就系雄激素高既占有欲强，不过占有欲强唔一定就性欲强，虽然好多时候两者有重叠。男人中意三妻四妾，但系唔一定就成日想咩，有啲女人娶过来只系为咗唔比其他男人接触。有啲女人需索无度，系雄激素强既体现，但系佢地唔一定就想霸住啲男人，只系满足欲望，男人另有所爱亦唔计较。两种欲望涉及既激素好多，同时又好复杂，哩度就唔详述了。
正因为占有欲可以好多方面，一个人如果系一啲方面有咁既表现，另外既方面自然都唔会例外，表面上有差别只系因为客观条件既制约。高官、巨贾追求大权、大富，亦追求多妻多妾，佢地唔一定用得晒啲权力同金钱，亦唔一定好似西门庆咁中意果啲嘢，但系佢地就系占有欲强，就系要据为己有。
女性就唔会了，佢地占有欲无咁强，一般只要有一个稳定既依靠就够了。所以贪官、奸商一般都系男人，女人做官经商都系稳步前进同做好本分就得了。
异性化既男人或女人因为体内激素系唔同咗既，占有欲既表现自然都会变化。同一个人唔同时期激素又系有变化既，所以人系环境影响下就可以由好变坏，就好似随住权力增加，雄激素增加，就会开始追逐权力。
占有欲无话好定唔好。知道占有欲既哩啲嘢无咩用，激素水平唔变化，任何理论都止唔到心痕。不过比较占有欲同性欲系好有意思既，以后慢慢再讲。系度讲两句先，性欲强既人先系浪漫，占有欲强就唔一定，好多人经常混淆，固定多个伴侣既人唔一定好识tum人，如果一个男人好叻沟女，一系就经常换来换去，一系就固定一个女人然后出去偷食。
2008/11/30
琴日参加咗两个小型既活动，话佢细，唔一定系规模细，只系相对唔同人既重要程度而言。
一个系换书，哩个搞过几次之后逐渐上路了，次数频密咗，一来主办方越搞越熟手，二来搞既成本仲低过唔搞，咁梗系搞啦。之前只系观摩过，无投身参加，今次本住清空部分旧书既目的而去，不过有啲书太旧被拒，最后以小搏大，都唔算渣都无。跟住林住逛下购书中心，点知系六楼发现一个打折场，虽然品种有限，但不乏值得买既书，最紧要系折扣吸引。
另一个系慈善盛典，哩个系三十年来第一次搞，排场同人物都够大，不过就内容强差人意。都算有幸请到一啲名人过来，先唔至于淡白寡味。慈善家做好事，佢地只系觉得系应该做既，无林过有无人表扬，我地对佢地进行嘉奖，亦都系应该做既。相信佢地哩班人接受类似既表彰都唔少了，我地哩个亦唔系咩大奖，只系受益人民既一点心意遮。慈善家唔系净系助人精神值得敬仰，佢地为人处事、行事作风都有好多为世人学习既嘢。
2008/10/26
哩两出都系近来比较热门既影片，不过风格截然不同。两者相比较下，觉得边出好睇就可以反映出各人既喜好同水平。
Wanted系大路既商业片，受众更广，更容易被大众接受。除咗大家都知既亮点——识转弯既子弹同Angelina既造型，特技都做得几好，画面上又有创新又够流畅，音效音乐基本无人留意，因为大家都比画面吸引，但系如果有留意就会知道系好嘢。不过剧情就只系一般，作为漫画改编电影，剧情虽有保证，但肯定比唔上足本原著，故事虽然唔系特别精彩，不过都好在无乜硬伤（唔似某些国产电影）。睇哩部片要趁热睇，因为佢无乜可以持续好耐既嘢，过一段时间后就会埋没于动作片既历史废墟中。
无睇过海角七号既人，好难估哩个名系咩意思，电影都系到中后段先解释系咩来既。入面既情书同支线爱情，只系有一条微丝连系住主线，可以话系硬加既，但系如果抽离出来既话，主线就会变得更平淡，影片就会比依家低档，所以话好多嘢强加上去就唔同晒。范逸臣只系中规中距，做好本分，女主角同一众配角先系好睇之处。田中千繪样貌有啲瑕疵，唔算完美靓女，但正因为如此，先可以避免沦为花瓶，佢唔咸唔淡既普通话同纯真既性格，真系好可爱。一众配角形象鲜明，各有内涵，虽然系扮一啲小市民，但戏里戏外都系能人异士，自然有人格魅力。情书一字一句都写得好好，而各人既对白亦都好精警，虽然我唔识台语同日语，但系听起身几顺耳。虽然主要插曲唔算非常好，只系过得去，不过有中孝介同一众音乐人支持，配乐同次要插曲都好受欢迎，以至于系发咗原声碟无耐询众要求又要修订曲目再发一次。众多优点盖过咗剧情平淡既缺点，令到本片口碑与票房双收。佢既诙谐同积极有别于以往受人好评但好难睇得落既台湾悲情或愤世影片，水平又高于以往一啲粗制滥造既台湾喜剧片，所以亦吸引到大批亚洲普通观众，即使无号召力强既大明星。
2008/9/27
一个考古学家同一个物理学家比考古知识，物理学家当然比唔过，反之亦然，但系比医学知识，就两个都有可能赢。
某啲成人同五年级小学生斗智既节目（中文或者英文既节目名因为记唔得全我就干脆唔讲了，反正大家都知），其实比赛就类似上面，斗唔过系正常既。即使系最有胜算既职业——小学教师，都唔识得晒咁多科，始终会死系一部分度。
外文版就无得系电视度睇，中文版既就算有得睇我都唔睇，唯一接触到既一啲片段系系公共汽车上睇既。我无详细完整咁睇过成个节目，所以我既讲法唔一定就系正确既。
节目一直有意无意咁欺骗观众，令观众以为成年人连小学生都斗唔过。事实上系咁既比赛方式下，成年人斗唔过系正常既，赢得晒既一唔系好彩，一唔系做马（从电视机时代开始有奖金奖品既智力游戏节目或多或少都有做马）。
所谓既小学知识，到咗二三十岁，都有好多已经唔记得晒，想复习都揾唔返啲书啦，而且小学课本变来变去，依家学既嘢同以前都唔同，大人就算记性好记得都无用。遇啱数学、自然哩啲唔会点变而且唔太死记硬背既题仲好啲，其他科既题就基本死晒了，答错一个字就算错晒。始终小学知识都系显得简单，出题者就要死咁系字里行间挖啲难题出来，挖出来既系啲连普通小学生平时都无去学既嘢，仲要出成填空题，就算依家随便揾啲成绩差啲既小学生来答都唔一定一字不漏，大人就更加难答中。
成年人虽然貌似学多几年嘢，但系学既嘢都唔同于小学学既嘢，就好似做咗三十年物理学研究，同考古学家来比拼都仲系靠三十年前学既历史知识（仲唔系考古知识）同埋哩三十年非常业余既考古知识，就算同一个净系研究咗一年考古既人来比，都斗唔过。成年人睇哩个节目学唔到有用既嘢，因为题目唔系太弱智就系根本无用既书面题目，仲要睇住班大人比主持人同小学生凌辱，而自己又得唔到“我识人地唔识”既信心。哩个节目我认为只适合小学生来睇，一来学到啲平时上课无讲既嘢，二来又可以睇住啲大人仲差过自己来增加信心。
相比之下，香港既小学智力节目，从以前既校际问答比赛到依家既通识大赛，题目范围同情趣既设计就考究好多，虽然难度较高倾向于成人智力节目（对于大人来讲难度反而比上面既节目低），但系从参赛者到观众都可以学到啲有用既嘢，而且公平性、竞技性、观赏性亦都高。
不过一开始就注定两类节目唔同，一个系属于有奖金奖品派既娱乐性节目，一个系知识教学性节目，前者系吸引果啲平时就中意睇娱乐节目既人群，哩啲人无论睇咩娱乐节目都系不知不觉咁走入创作人员铺设既泥潭中，而娱乐节目创作人员既目的亦只得一个，就系摸清观众心理用各种方法吸引观众，其他嘢（例如名人既生死、是否符合科学规律等）与佢地无关。
2008/8/14
当知道自己将会比较安全之后，人类会连一啲啲既小便宜都要贪。其他动物既活动都只系为咗生存，人类系唯一具有贪欲既动物。
随住奥运进行同亚运逼近，交通管制更严格了，前两年开始加交通协管员，依家又加埋啲交通志愿者，人手似乎越来越多。咁都好，多啲人做嘢，效果应该会好啲。不过交通协管员既旗仔剑法经常比人化解甚至反击，志愿者更加系无人苏，变晒志愿稻草人。最恶既都算系交警了，不过佢地毕竟人数少，而且多数时间要去搞啲机动车事件，唔得闲来搞路人事务，即系皇帝经常唔上朝，下便就梗系立立乱。
过马路既人虽然多数都仲系绵羊（跟大队随波逐流，可以系牧羊犬指挥下行去边就边），不过仲有好多系羚羊（见无狮子或者见到狮子就快速飚）、豺狼虎豹河马犀牛（理得你狮子点叫，眼尾都唔望下就照冲），协管员志愿者哩啲小狗小猫又点会放在眼内。交警狮子以一挡百，有时都会比有嘢带领既羊群践踏而过，一个大将都会比一班兵仔用吉死。
冲红灯乱踩线跨护栏最大既危险居然唔系比车撞，而系比人拉，当无人看管，以上行为就变咗零危险，人类就要贪埋哩一两步路，即使有人管，有人带头壮胆后就又乜都够胆死，真系无知者无惧啊。
相信果啲次级凶猛动物们并唔系系马路上先系无法无天，佢地肯定生活上、工作上都系一样天不怕地不怕，哩部分人及其影响既身边人就系犯罪违规既潜在人群。践踏斑马线就变成践踏铁窗栏杆一样。
交警、协管员、志愿者等等工作人员系好辛苦既，个个晒到面红耳热，吹鸡吹到喉干舌燥，吸尘吸到咳喘涕泣，明明系依法办事，变成人民公敌，得到既亦只系小小既人工，人民解放军虽然系不计酬劳，但系声誉就好好多了。连环卫工人既地位都越来越高，交通工作人员应该得到既掌声都唔应该咁少。系同运动员鼓掌既间隙，都应该比啲掌声我地既交通人员，同时做个遵纪守法既素质道德优越好公民。
2008/7/18
系讲一个百科知识问答节目，入面啲参赛者预先知道答案，制作者想要边个生就生，想要边个死就死，但系比人发现咗，被告上法庭。
类似既揭幕电影好多，不过大部分都系意图写实乜都拍晒出来搞到废话连篇，睇都唔想睇，而且试图讲大道理，令观众觉得包袱太重。而Robert Redford就好聪明了，虽然依然唔算短（有两个钟），不过都睇得好顺畅，一来系剧本写得好（剧本好唔系要指剧情好，唔好混淆，不过本片剧情一样好），二来好人坏人全部都无太差既结局，因为全片都无边个系观众憎恨既角色，观众无非系想睇好人好报坏人恶报既者，好多电影因为真实事件，唔可以比好人一个好既结局而令到观众觉得好唔爽，三来因为无极端既人物，所以可以轻松咁讲道理，既唔使逼观众于现实黑暗中挣扎，又唔会沦落于无内涵或者讲啲全世界都知既嘢。加之演员做得好，虽然大牌无乜。
2008/6/11
好既电影系要根基既，好似咩超人、汽车等等，我地无咁既基础，自然票房有限，好似哩啲咁既功夫片，无论拍成点，肯定可以吸引人睇，睇下北美票房亿元以上既电影就知都系有一定群众文化基础既。
有票房同好唔好睇系两回事，好似某啲功夫片、武侠片，就算票房好，都唔代表好睇，一样可以骂声一片。
故事好简单，就系讲无名英雄成长，然后正义打败邪恶，本身无乜转折，故事只要无漏洞就得。好睇就好睇在人物设计同动作设计，动画片可以达到既效果唔系人力可以打出来既，同样既效果我地以前只可以系日本动画片入面见到，而电脑技术进步做出来既流畅动作同精美图像可以讲系前无古人。本片既大屏幕或者高清版本会系必备，比起一般既动作片有更快既切换同更多既分镜，同时人物设计精细程度比起《Shrek》《Ice Age》等又再更进一步，睇其他版本会系浪费同损失。
2008/6/4
本身故事都可以，有啲颠覆一开始就等住睇好人获胜坏人无好下场。不过可惜演员唔得，原来有好既导演，都仲要有好既演员。
经常有好演员果阵就无好戏，有好戏果阵就无好演员，少数时候两样都有果阵就有好电影出来了。王晶年中浪费好多好既演员同剧本。
王晶不漏都净系拍得唔演得，同埋不漏都演埋啲笑角或者奸角，今次演好人演唔出正义感。张家辉就只有系杜琪峰既电影入面先好少少，系本片中演唔出啲本质既奸，唔会奸到比人睇完有警恶惩奸既快感。陈炜就仲系处于拍电视状态，未得高人点拨就好难跳出电视水平，系本片就散发唔出角色应有既色诱电力。
如果换啲演员来拍可能会好啲，不过哩出电影好明显就系无咩人重视求其拍下既，效果好啲差啲创作人员都无乜所谓。
2008/5/3
五一放假，应该讲系逃假。
因为时间少，无去边度玩，多数系屋企。
用电脑睇埋《Prison Break Season 3》净返既。从Season 2开始，就变成开放场景，咁就惨了，脱离咗本剧既卖点，讲到开放斗争场景，基本上可以林到既都比《24》用几年时间讲晒，搞到其他剧再来拍就无晒意思。系Season 3又林住放返系封闭场景，但系Season 1又基本将封闭斗争场景啲嘢拍晒了，断咗自己后路。仓促拍摄之下，除咗两兄弟，其他人既性格形象都草草完成，因为Season 1入面所有人物都系经过精雕细琢既，设计得非常完美，到后面两年，人物过于错综复杂，导致人物吸引力大减，再唔可以成为街坊们既谈资（想当年每个人物都有各自既群众拥护者）。虽然并未可以算系失败，但系竞争咁激烈既时代，部分集数既吸引力丧失就意味着会被淘汰。
我啱啱睇完，PEARL系下星期就开始播了。收视肯定全世界既趋势都一样。
2008/3/20
讲既就系四兄弟，因为母亲系打劫事件中被杀，聚埋一齐调查死因，发觉原来同黑帮有关，又同一笔保险金有关，调查过程中都死咗唔少人，又被黑帮追杀，但系四兄弟经过重重困难终于报到仇。
故事虽然听上去比较简单同老土，不过剧情上都有巧妙之处，众演员又都唔系泛泛之辈，虽然唔系一线大牌。唔会好似类似既片卖弄暴力同色情，力度控制得比较好。又有温情感性既一面，虽然系几个男人，不过男人之间既手足情同相互合作就系看点。不足就系慢小小，吊唔起瘾，有啲人可能会睇唔落。
2008/3/9
哩个系法文，不过我唔识法文，哩个系片名来既，即系《第八日》。众所周知，上帝造物用七日，正规版本片中无提及，只系讲咗佢自己既版本，再加第八日造咗啲乜。
有人被感动，我就无了，因为睇唔惯入面先天愚型既样，唔知系化妆定系真系咁既样，太典型了，直头可以罗来做教材。同《Rain Man》边有得比，唔系有问题就算同类，一个系自闭，一个系先天愚型，病都唔同，样就更唔同，自闭症仲好啲，智力发育可以唔受影响，但系先天愚型就无乜办法了，医生见到都唔想医。
就系音乐同歌曲好啲，同Daniel Auteuil演出无可挑剔，其他你话想象力不及类似既《Forrest Gump》（废话，Zemeckis既想象力只有Spielberg可以相比），情节、对白、人物不及好多同类，所谓“经典”都只系扼下人。
想写埋之前睇既几出电影，不过唔系一睇完写，过后再写既话就写唔出几多嘢了。
2008/2/8
苹果系人名，系主角个名。范冰冰做良家妇女好过佟大为做卑鄙小人，梁家辉交足货扮咩人都掂。如果范冰冰无进步过，佢依家都只可以做入面果啲花瓶角色，睇得出佢系做得好过以前好多。
唔知我睇既系咩版本，有啲激情戏，偶有露点。唔系女主角人气加埋激情戏炒作，可能就无咩人知道哩出戏了。范冰冰做激情戏都几睇得下，不过男既唔得，佟大为同梁家辉就唔系适合既床戏人选，睇上去唔好睇，唔系个个做都好睇既。
2008/1/27
都系以前写既嘢。
系屋企睇咗《The Island》，译为《逃出克隆岛》，译得麻麻地，首先，出戏入边系有个岛（The Island），不过人地唔系克隆岛，只系一个岛，人地英文片名用得就几好，既代表咗片中一个意象，又唔会太直白，哩个咁既中文译名讲到明系同克隆有关，无疑减少咗唔少悬念。另一个译名《神秘岛》虽然老土咗啲，不过都好得多。
克隆唔系一个新鲜既题目，当年既《The 6th Day》等片就系讲哩类题材。系哩几年新闻时不时就报道有关克隆既嘢，Hollywood最中意将潮流搬上银幕架了。题材唔新鲜，剧情亦都似曾相识，Matrix Triology同埋《i, Robot》之类都系讲哩啲嘢，无非都系人类创造出来既嘢同人类既斗争。好多剧情未睇就已经估到佢要讲乜，不过都有好多出人意表既安排。除咗剧情之外，场面好睇，亦都不乏深意。
Hollywood既大场面我地都叫见得多了，年中科幻片动作片一大箩，追逐、爆炸、飞车哩啲咁既场面系唔同既戏入边都睇到过，不过睇哩出戏依然唔觉得闷，个几两个钟头拍得“节奏明快、张力十足”（我林唔到咩词形容，水平问题，只好套用内地传媒经常罗来评论动作片既评语），虽然对住啲似曾相识既动作场面，依然会投身其中，略感紧张，Michael Bay既功力可见一斑。用啲似曾相识既剧情同场面，依然都拍得咁吸引，“这就是麦克尔贝”。
《神话》《无极》等玩既亦系场面，我林应该无人会认为哩两出戏对外宣传既重点系在于剧情，事实上，佢地既剧情亦无资本罗出来吸引人，如果佢地唔突出明星、场面，仲会有咁多人去睇佢地咩？有人会为咗感人去睇佢地咩？想要感动想流眼泪既人一早去晒睇《千里走单骑》啦。《神》《无》既场面对于在中国境内制作既影片来讲已经算系新鲜或者突破了，《The Island》既场面系Hollywood只系重复同相似，但系人地拍出来系吸引，而《神》《无》拍出来就比人闹。《The Island》剧情唔算太精彩，只系算系普通偏好，但系加上吸引（即使唔新鲜）既场面就算系一出好戏了。科幻世界我地见得多，再精细既我地都见过啦，《The Island》着力点当然唔放系哩度，只系一路带领观众runrunrungogogo一路走马观花咁睇下未来世界，咁样已经够了，已经够睇了，至少一路睇唔会一路闹挂。而《神》《无》等由于剧情唔掂，场面睇起身亦都好“别扭”，搞到成出戏就唔好睇了。
可能有人会话人地系用美金堆砌出来既场面，咁我地一样系用人民币或者“港银”砌既者，人地无咩明星，Ewan Mcgregor同Scarlett Johansson虽然系红，但仲唔系一线，我地既全部都系人气明星。我林系我地啲人唔够用心，拍电影系要“用个heart”既，拍电影唔系净系为咗钱为咗成名。系电影中有一小片段就系话中国制既电器部件坏咗，人地就识来咁样话我地，单睇戏入便，人地连个人都可以整得咁似，整到一丝不苟、一模一样，我地整既一个零件就都咁容易坏，无论人地系有意无意，都可以反映出一啲嘢挂。唔够钱我地可以拍少啲特技场面（不过相信我地已经系将特技场面减到最少数量了），但系唔好整啲粗制滥造既嘢出来挂。哎，不过我地啲导演们亦都几命苦既，无人地咁多钱可以挥霍，拍完出来又比人闹，不过人地有钱挥霍一样系比果便啲人闹。人地仲命苦，我地虽然比人闹但系票房一路闹一路上，人地比人闹之余票房都唔掂，真系惨了。我地啲场面虽然唔好睇，不过都仲大把人争住入去电影院睇，人地啲场面对我地来讲算好睇（对果便啲人可能已经唔够好睇了），不过就无乜人去电影院睇。
讲到内涵，哩出戏当然比唔上Matrix、《Back to the Future》之类既科幻经典之作，不过都带出唔少嘢既，例如话性同记忆系人类与身俱内既嘢，无论系人或者唔系人都系向往自由既等等，相信大家睇既时候就会好自然林得到架了（当然睇完就唔记得咗，好似我依家咁，只好以等等带过）。顺便讲下其中一段戏，Lincoln同Jordan学识性哩样嘢太快咗啲，系完全无灌输既情况下，一两日学识KISS已经好好嘢了，仲要学识埋SEX就太离谱咗啲，不过无办法啦，过咗哩场戏后边就无机会咩了，只好强加系哩度，无理由系最尾来加场戏比佢地咩架，一来唔连贯，二来扰乱主题。
哩出戏无论对于科幻喜爱者或者非科幻喜爱者都应该去睇返次既（最好揾啲画面清晰啲既版本，依家唔系睇《花样年华》——听对白就够了），至少都睇返次啦，都几好睇既，起码睇完可以有所感悟，得到一次视听享受，唔会心情差然后想闹人。
以免过长，分开继续放。
哩个星期蒲学校图书馆睇咗几部电影。因为后知后觉地知道原来系图书馆有可能睇到电影，一开始既兴奋令我哩个星期内睇咗三部电影。
先睇咗《Seabiscuit》，有关赛马既，系一出励志片，讲三个人同一匹马从落泊到成功既过程，配以三十年代美国经济危机既背景，表现美国人既失败中顽强求胜最后走向成功既精神。
评论讲讲哩类题材（赛马题材）既电影都几多，不过我好似就无点睇过，所以觉得都几新鲜，古老汽车，马场，马匹，骑马等等，都令我近距离接触到。竞赛场面通常都系扣人心弦，令人血脉沸腾既，而哩出戏既跑马场面亦都拍得几好，几吸引。拍动物戏比拍人戏辛苦好多，要人为控制动物做自己想要既嘢就更困难，片中有好多马匹既精彩演出，值得一睇。
跟住睇咗《Lost in Translation》，系一个讲述两个美国人发生系异国他乡东京既淡淡既爱情故事。讲佢淡，系因为并无太多爱情特写，无太多爱情语言、动作、情节，一切都发生得咁平淡、自然，如溪水，如烟雾。一个经历多年婚姻而无晒爱情新鲜感既男人，一个被丈夫冷落既女人，势必会从婚姻外寻求一啲激情，两个人相遇了，在一个不熟悉既地方，与外界难以沟通，相互吸引，然后产生爱情。有评论讲，佢地两个既感情系介与友情同爱情，有啲啱亦有啲唔啱，系咪爱情视乎观众自己感觉，所以片中亦无交待清楚，留卑观众自己去林。其实系咪爱情并唔紧要，爱情只系一个名义，最重要系两个人既感觉。导演Sophia Coppola将身处异地既果种孤独、无奈、仲要强颜欢笑既情感拍得好传神，我林应该讲出咗好多人既心声，而演员既出色表演亦都令哩种情感表达得更真实。
睇完淡淡既爱情，就睇一啲典型啲既爱情。睇咗《When Harry meets Sally》，一出经典爱情片。男主角系今届OSCAR主持人Billy Crystal，而女主角就系当年仲未红而其后成为美国甜心既Meg Ryan。对白、情节都几搞笑，几经典，而当中一段出神入化既假扮就更系经典。虽然觉得情节有啲旧，都系两个人从冤家到恋人既故事，但其他既嘢完全盖过咗哩点不足，令哩出戏成为经典。
哩个星期由于放假，所以可以睇多咗电影。
先睇咗《Mission Cleopatra》，Cleopatra系凯撒时代既埃及妖后。哩出系一出法国喜剧片。讲起法国喜剧，《第十放映室》（CCTV10既一个节目）哩个星期先介绍完，亦系因为睇咗介绍先会去睇哩部戏。佢系比较近既，所以充满咗Hollywood商业电影味道，不过亦具有法国喜剧电影既一啲特色。电影讲既系一个无能建筑师帮Cleopatra建一座难度好大既宫殿，然后请来咗术士帮手，克服重重困难同阻挠终于大功告成。虽然故事同某些桥段都比较旧，同埋有抄人地好多人既，不过营造出既笑料都唔少，都几搞笑。
跟住睇咗《Something's Gotta Give》，Jack Nelson同Diane Keaton两位老演员出演既爱情故事。既系爱情故事，亦都系一个喜剧故事。Jack系戏中笑味十足，哩个角色以佢咁丰富经验扮起身简直游纫有余，轻而易举营造搞笑气氛。佢既果啲风趣幽默既语言，现实既哩种人，就算系佢咁大年纪，一样系好似戏中咁迷死唔少女人女仔。有啲睇唔惯老演员既爱情，可能唔太中意Diane挂，觉得佢唔够靓，虽然剧中既Jack同Keanu Reeves扮演既角色都被哩位中老年女人深深吸引。哩出戏讲明咗，内在系可以令外在更美丽，美丽唔系只与样貌身材年纪挂钩。
去中华广场睇咗《救命》，只系小厅。哩出戏如果唔系系电影院睇，我觉得可能更加唔恐怖。总体既恐怖只系通过演员表演同音效来制造，做得唔算好专业恐怖。我睇过既恐怖片唔多，哩啲只系好业余既见解。李心洁同林嘉欣既表演都好出色，不愧为影后，演技都好好。睇过一篇文章话按常理应该系嘉欣演子清，心洁演孙玲，不过导演系专登咁样安排两个演员出演相反既角色，因为想超越常理，同时令演员有更出色既发挥。不过睇完觉得都系按常理演好啲，虽然演技都好，亦交足功课，不过感觉上如果换返原来咁会更有神韵。故事都算有啲曲折既，不过铺排上就唔算太完美。最恐怖既部分系最尾果度，女人颠起身系最恐怖既（无论作品同现实中都系），之前既不够恐怖可能系要欲扬先抑挂。
今日一日睇咗三部电影，都系电视途径既。先系《新扎师妹》，几搞笑。觉得杨千嬅同吴彦祖既表演都仲算可以，千嬅系咁自然既搞笑，而吴彦祖都唔净系扮演靓仔花瓶角色了，都颇有内在演出。
跟住系睇返录咗既《U571》。第二次睇了，对故事已经有过认识。哩次睇只系再睇返啲效果。战斗场面既制造同对潜艇等海军装备既刻画，都做得几精致同真实。都仲系觉得《U571》比《Master and Commander》好睇（因为之前已经讲过，所以就用“都仲系”）。
然后睇咗《下一站天后》。真系睇完先知原来天后系个站名，开始仲以为只系得天皇巨星一个意思添。我林应该算系励志片挂，虽然表现唔系咁突出。故事老土，有啲唔符合逻辑，亦唔算安排得好，亦做得唔够真实咁。只系需要一啲有号召力既明星，就可以来赚票房了，哩出戏亦基本得哩个任务。
抄到几篇嘢，就放上来了。
《恋爱中的宝贝》
唔知大家未睇过哩部电影既人系咪认为哩部系爱情片呢？情侣们去睇佢又系咪多少因为佢系爱情片呢？
我觉得哩部电影如果要话系爱情片都勉强得既，不过佢唔系一部浪漫温馨爱情片，甚至讲，唔似爱情片（可能我对爱情片认识比较少者）。
先讲下片名。周迅在电影入边叫“宝贝”，所以话哩部戏勉强可以称为爱情片系因为佢的确讲既系一个爱情故事，故事既女方就系周迅所饰演既“宝贝”。片名咁样叫亦都唔算错。
哩个爱情故事既女方系一个有精神病既人，哩部戏讲既就系一个正常人同一个精神病人既爱情经历。根据精神病哩个线索，哩部戏就拍得比较怪诞，比较脱离于真实，亦都可以讲比较前卫，哩种手法就系李少红导演在宣传中提到既比较新鲜既拍法了。如果系文学类中讲，有啲似卡夫卡既风格。
整个故事都算完整，但如果净讲剧情其实就无乜好睇，成出戏差唔多两个钟讲咁样一个故事实在太多，故事用一般拍法半个钟就可以讲完，拖长既果啲时间系手法造成既。故事无非就系一个男既识咗一个女既，然后两个相爱，后来发现个女既有病，最后个女死埋。哩啲都可以算系爱情故事题材既，不过哩个故事实在无乜波澜，情节上无乜吸引。又唔搞笑，又唔感人，又唔浪漫甜蜜，又无乜爱情哲理，如果情侣们要把哩个作为一出爱情故事来睇就实在无谓。
原先可能全世界都以为哩部戏有三个重要人物，周迅，黄觉，陈坤。不过其实陈坤在戏中只系一个可有可无既角色，换咗第个来演一样得，佢只不过系哩部戏在宣传时既一个啄头而已。
差啲唔记得讲小室哲哉。我系睇完之后睇职员表见到佢个名先林起区，睇电影果阵完全无留意到音乐，可见配乐唔算太吸引，亦都突出唔到，唔似英雄或者卧虎藏龙之类入边既果啲配乐，同电影配合得好之余令人觉得有锦上添花，绕梁三日之感。
可能我素质有限，唔可以明白哩部戏既真正意义同实质。不过我林可以明白既人都唔会多。
如果系为咗睇周迅，周迅在片中并无太多可睇，唔系话演技唔得，系佢既形象唔多可观。如果系为咗周迅，只可以话系去睇佢尝试扮演一啲新既唔同于以前既角色者。
如果系话情人节林住去睇部爱情片，建议先考虑《大城小事》同《我爱天上人间》（哩两部我都未睇过），因为觉得果两部比哩部算得上系爱情片，果两部睇完了仲想睇爱情片先来睇哩出啦。
《大城小事》
电影一开始，首先一个感觉就系音乐好正，即使其后既音乐并未似开头咁吸引，但已经卑咗人一个好既印象，令人先入为主咁带住一个哩出戏既音乐唔错既感觉去感受之后既音乐，自然有所收效。先讲下电影既配乐，有好听既旧歌，有好听既音乐，因为有黎明既亲密战友雷颂德配乐，即使唔可以算系完全配合，都令人觉得好好听，而且配乐在片中起到一个唔细既作用，卑人感觉好唔错。所以哩出戏既原声CD又作为收藏之列了，各位见到既话就比我听啦。
黎明系编剧之一。故事本身并无太跌宕，比较普通咗小小。由于故事并唔突出，就无太多爱情既道理，可能情侣去睇无乜收益。不过哩啲无伤大雅，就其他方面哩出戏就值得大家去睇。
黎明系扮一个叫周谦既医生，王菲系扮一个叫辛小月既策划人（佢既职业我唔知叫咩，姑且咁叫住先），一个几新鲜既职业。故事一开始就讲两个人分手，然后最后两个人系返埋一齐。就如片名所讲，戏入边讲既都系啲小事，故事吸引性唔算太突出，不过总算讲得明白，讲得合理。
王菲在戏中表现既就系一种几似佢本身特色既冷艳、决绝特征，都几做返自己，黎明既角色亦都比较平凡，就系一个普通人咁，无需太多出色发挥。
靓人靓景系哩出戏既一个特点。电影不辞辛苦咁拍摄咗唔少上海靓景，好似啲夜景，建筑等，加上本身女主角既职业，就可以有更多美仑美奂既靓景色。咁迷人既景色加上动听既音乐，系一种唔错既享受。男女主角就唔使讲了，片中出现既多位女配角，亦都算佳人美貌，虽然戏份唔重，但都为电影生色不少。
电影中不乏一啲搞笑成份，成出戏睇得好轻松顺畅，情侣两个去睇亦唔会睇得太沉重，唔使好似某些爱情片咁睇完又要帮个女伴抹眼泪又剩（当然果类电影都有另外既独特魅力）。情侣去睇哩出戏，既唔会觉得好闷，亦唔会觉得好沉重，好混乱，感觉都会几好。
我想同琴日睇既《恋爱中的宝贝》作下对比。《恋》标榜住名音乐小室哲哉等人，不过睇戏既时候都突出唔到，有啲睇完好似戏中无出现过配乐既感觉。《大》中既音乐就突出得几好，系果啲唔睇电影都会被吸引既音乐，自然就会比人印象深啲。《恋》既拍摄画面都算几色彩鲜艳夺目，不过令人会有混乱之感，加上电影既魔幻性，基本观众可以感觉到既美感唔多。而《大》既美就几大自然，好容易卑人接受到。打个比喻，一个系个人思维混乱心烦意乱，一个系个人悠闲自在心平气和，就算对住同样既美景，后者得到既美既享受都会比前者多。琴日拙作讲过《恋》并唔多似爱情片，今日既《大》就系典型既爱情片味道了。情人节期间情侣们就应该睇啲咁样既片，过下轻松快乐浪漫既情人节。
工具 
